మాకు న్యాయం చేయాలి

హైద‌రాబాద్: తమ న్యాయమైన సమస్యలను పరిష్కరించాలని ఆంధ్ర‌భూమి ఉద్యోగులు రాష్ట్ర మానవ హక్కుల కమిషన్ చైర్మన్​ జస్టిస్ చంద్రయ్యను వేడుకున్నారు. ఏడాది కాలంగా యాజమాన్యం జీతాలు చెల్లించకపోవడంతో తమ కుటుంబాల ఆకలి తీర్చలేకపోతున్నామన్నారు. ఇంటి అద్దెలు, పిల్లల ఫీజుల కోసం పడరాని పాట్లు పడుతున్నామని ఆవేదన వ్యక్తం చేశారు. ఆర్థిక కష్టాలు భరించలేక ఇప్పటికే నలుగురు తోటి ఉద్యోగులు ప్రాణం కోల్పోయారని తెలిపారు. కనీసం మీరైనా తమకు న్యాయం చేయాలని జస్టిస్ చంద్రయ్యను వేడుకున్నారు. యాజమాన్యం అనుసరిస్తున్న నిర్లక్ష్య వైఖరిపై శుక్రవారం ఆంధ్రభూమి దినపత్రిక ఉద్యోగులు తెలంగాణ రాష్ట్ర వర్కింగ్ జర్నలిస్టుల సంఘం (టీయూడబ్ల్యూజే) ఆధ్వర్యంలో హెచ్ఆర్సీలో పిటిషన్ దాఖలు చేశారు.

ads

కొవిడ్ సాకుతో ఆంధ్రభూమి యాజమాన్యం ఏడాది కాలంగా ప్రచురణ నిలిపివేయడంతో పాటు ఉద్యోగులగు జీతాలు చెల్లించడం లేదన్నారు. రిటైర్డ్, కాంట్రాక్ట్ ఉద్యోగులను తీరని అన్యాయానికి గురిచేస్తున్నారని వారు పిటిషన్ లో పేర్కొన్నారు. చట్టపరంగా తమకు దక్కాల్సిన ప్రయోజనాలను యాజమాన్యం విస్మరిస్తుందని ఉద్యోగులు వాపోయారు. పత్రికను పునరుద్ధరించి, రెండు తెలుగు రాష్ట్రాల్లో దానిని నమ్ముకొని జీవిస్తున్న వేలాది కుటుంబాలకు న్యాయం చేకూర్చాలని కోరారు . హెచ్ఆర్సీని ఆశ్రయించిన వారిలో టీయూడబ్ల్యూజే రాష్ట్ర ప్రధాన కార్యదర్శి కే విరాహత్ అలీ, రాష్ట్ర నాయకులు ఏ రాజేష్, కే రాములు, ఆంధ్రభూమి ఉద్యోగుల సంఘం కన్వీనర్ వెల్జాల చంద్రశేఖర్, నాయకులు విజయప్రసాద్, జెఎస్ఎం మూర్తి, కొండవీటి రవి, యం. స్వామినాథ్, మధుకర్ ఉన్నారు.