జాతర ఖ్యాతిని పెంచిన ఘనత సీఎందే

సుర్యాపేట జిల్లా : పెద్దగట్టు జాతర ప్రాశస్త్యాన్ని పెంచిన ఘనత సీఎం కేసీఆర్ దే నని రాష్ట్ర విద్యుత్ శాఖామంత్రి గుంటకండ్ల జగదీష్ రెడ్డి పేర్కొన్నారు. యాదవుల మీద ఉన్న మక్కువతో కొత్తగా ఏర్పడ్డ తెలంగాణ రాష్ట్రంలో పెద్దగట్టుకు పెద్ద ఎత్తున నిధులు మంజూరు చేశారని మంత్రి తెలిపారు. సూర్యాపేట జిల్లా కేంద్రంలోని పెద్దగట్టు లింగమంతుల స్వామిని సోమవారం ఉదయం సహచర మంత్రి తలసాని శ్రీనివాస్ యాదవ్ తో కలసి సందర్శించారు.

ads

‘జాతరలో సకల సదుపాయాలపై సీఎం కేసీఆర్ ప్రత్యేక దృష్టి సారించారని మంత్రి చెప్పుకొచ్చారు. అందుకే రెండు తెలుగు రాష్ట్రాల తో పాటు పొరుగు రాష్ట్రాల నుంచి లక్షలాది మంది భక్తులు తరలి వస్తున్నా ఎటువంటి ఆటంకాలు ఎదురుకావడం లేదని అన్నారు. అంచనాలకు మించి వస్తున్న భక్తులతో స్వరాష్ట్రం లో పెద్దగట్టు జాతర కన్నుల పండుగగా సాగుతుందని మంత్రి అభివర్ణించారు. సుదూర ప్రాంతాల నుంచి తరలి వస్తున్న భక్తుల రద్దీని దృష్టిలో పెట్టుకున్న అధికారులు పెద్దగట్టు చుట్టూ 50 ఎకరాల విస్తీర్ణంలో పార్కింగ్ సౌకర్యం ఏర్పాటు చేశారని మంత్రి జగదీశ్​ రెడ్డి చెప్పారు. అంతే గాకుండా సీసీ కెమెరాలతో అత్యంత పటిష్టమైన భద్రతా ఏర్పాట్లు చేశారని వెల్లడించారు. కరోనా వ్యాధి ప్రబలిన నేపథ్యంలో శానిటేషన్ పై అధికారులు ప్రత్యేక దృష్టి సారిస్తున్నారని, మొదటి ప్రాధాన్యత ఆంశంగా శానిటేషన్ ను పెట్టుకున్న సిబ్బంది షిఫ్ట్ ల వారిగా రౌండ్ ది క్లాక్ జాతర పరిసరాలను శుభ్రపరుస్తున్నారన్నారని మంత్రి తెలిపారు. కాళేశ్వరం జలాల ప్రభావం పెద్దగట్టు జాతర పై స్పష్టంగా కనిపిస్తోందన్నారు. లింగమంతుల జాతర లో పాల్గొంటున్న రైతుల కండ్లలో కనిపిస్తున్న ఆనందమే అందుకు నిదర్శనం’అని మంత్రి జగదీశ్​ రెడ్డి సంతోషం వ్యక్తం చేశారు.

‘జాతర అత్యంత వైభవంగా సాగుతుంది. లక్షలాది మంది భక్తులు తరలి వస్తున్న జాతరలో కాళేశ్వరం జలాలు తెప్పించి తాగునీరు అందిస్తున్న మంత్రి జగదీష్ రెడ్డికి యాదవ సమాజం రుణపడి ఉంటుంది అని మంత్రి తలసాని శ్రీనివాస్​యాదవ్​ కొనియాడారు. అంచనాలకు మించి హాజరవుతున్న రద్దీని దూరదృష్టి తో ఆలోచించిన మంత్రి జగదీష్ రెడ్డి పెద్ద పెద్ద ట్యాంకులు లు నిర్మించడం అభినందనీయమన్నారు. లింగమంతుల స్వామి యాదవుల ఇలవేల్పు అని అటువంటి స్వామి కరుణా కటాక్షాలతో రాష్ట్రం సుభిక్షంగా వర్ధిల్లాలని తలసాని ఆకాంక్షించారు. కొత్తగా ఏర్పడ్డ తెలంగాణ రాష్ట్రంలో దేవాలయాలకు పూర్వ వైభవం తెచ్చిన ఘనత సీఎం కేసీఆర్​దే అని మంత్రి తలసాని ప్రశంసించారు. తెలంగాణ కు మణిహారం యదాద్రిని అభివృద్ధి పరచడం తెలంగాణ రాష్ట్రం లో అత్యంత ప్రాశస్త్యం కలిగిన పెద్దగట్టు జాతర కు నిధులు మంజూరు చేయడం వంటి అంశాలు సీఎం కేసీఆర్ దార్శనికత కు అద్దం పడుతున్నాయన్నారు. నిధులు విడుదల చేయించడంతో పాటు అహర్నిశలు కృషి చేసి జాతర లో పూర్తి ఏర్పాట్లు జరిపించిన మంత్రి జగదీష్ రెడ్డికి కృతజ్ఞతలు’అని శ్రీనివాస్ యాదవ్ తెలిపారు.
జిల్లా కలెక్టర్ వినయ్ కృష్ణారెడ్డి ఇద్దరు మంత్రులకు సాదరంగా అహ్వానం పలుకగా మంత్రులు, ఇతర ప్రజాప్రతినిధులు లింగమంతుల స్వామికి ప్రత్యేక పూజలు నిర్వహించారు.

 

ఈ కార్యక్రమంలో మంత్రుల వెంట సూర్యాపేట జిల్లా ప్రజాపరిషత్ చైర్మన్ గుజ్జ దీపికా యుగంధర్ రావు, రాజ్యసభ సభ్యులు బడుగుల లింగయ్య యాదవ్, ఎమ్మెల్యే గ్యాదరి కిశోర్ కుమార్, చిరుమర్తి లింగయ్య, యన్. భాస్కర్ రావు, బొల్లం మల్లయ్య యాదవ్, జిల్లా గ్రంథాలయ సంస్థ చైర్మన్ నిమ్మల శ్రీనివాస్ గౌడ్,
సూర్యాపేట మున్సిపల్ చైర్మన్ పెరుమాండ్ల అన్నపూర్ణమ్మ, స్థానిక మార్కెట్ కమిటీ చైర్మన్ ఉప్పల లలితా ఆనంద్ తదితరులు పాల్గొన్నారు.