తెలంగాణ ఉద్యమకారులకు గుడ్ న్యూస్
-8వారాల్లో పెన్షన్లు, ఇళ్ల స్థలాలు ఇవ్వాలని హైకోర్టు ఆదేశాలు
-ఇప్పటికే అభయహస్తం స్కీం కింద అప్లై చేసుకున్న ఉద్యమకారులు
వరంగల్ టైమ్స్, హైదరాబాద్: తెలంగాణ రాష్ట్ర సాధన కోసం ప్రాణాలకు తెగించి పోరాడిన ఉద్యమకారుల సుదీర్ఘ నిరీక్షణకు తెరపడే సమయం దగ్గరపడిందని అనుకోవచ్చు. తమకు ఇచ్చిన హామీల ప్రకారం ఇళ్ల స్థలాలు మరియు పెన్షన్లు మంజూరు చేయాలని కోరుతూ పలువురు ఉద్యమకారులు దాఖలు చేసిన పిటిషన్ పై రాష్ట్ర హైకోర్టు సానుకూలంగా స్పందించింది. ప్రత్యేక రాష్ట్రం కోసం పోరాడిన వారి సంక్షేమాన్ని విస్మరించకూడదని, వారికి రావాల్సిన ఫలాలను త్వరితగతిన అందించాలని న్యాయస్థానం ఈ సందర్భంగా స్పష్టం చేసింది. తెలంగాణ ఉద్యమకారులకు పెన్షన్లు, ఇండ్ల స్థలాలు ఇవ్వాలంటూ ఉద్యమ జేఏసీ నాయకులు రాష్ట్ర ప్రభుత్వంపై హైకోర్టులో పిటిషన్ దాఖలు చేసిన విషయం తెలిసిందే.
ఈ కేసుకు సంబంధించిన విచారణలో పిటిషనర్ల తరపున న్యాయవాది కరుణాకర్ రెడ్డి తన వాదనలను బలంగా వినిపించారు. ఉద్యమ సమయంలో కీలక పాత్ర పోషించిన వీరంతా ప్రభుత్వం ప్రకటించిన అభయహస్తం పథకం కింద దరఖాస్తు చేసుకున్నారని, కానీ క్షేత్రస్థయిలో వారికి ఇంకా న్యాయం జరగలేదని ఆయన హైకోర్టు దృష్టికి తీసుకెళ్లారు. అభయహస్తం ద్వారా లబ్ది పొందాల్సిన అర్హులైన ఉద్యమకారులందరికీ తక్షణమే సాయం అందించాల్సిన బాధ్యత ప్రభుత్వంపై ఉందని ఆయన వాదించారు.
రెండు వైపుల వాదనలను క్షుణ్ణంగా పరిశీలించిన జస్టిస్ విజయసేన్ రెడ్డి, ఉద్యమకారుల పట్ల సానుకూల నిర్ణయం తీసుకుంటూ తీర్పును వెలువరించారు,. పిటిషన్ దాఖలు చేసిన వారందరికీ రాబోయే ఎనిమిది వారాల వ్యవధిలోగా ఇళ్ల స్థలాలను కేటాయించాలని, అలాగే పెన్షన్ల ప్రక్రియను పూర్తి చేయాలని ప్రిన్సిపాల్ సెక్రెటరీ మరియు ఫ్రీడమ్ ఫైటర్ శాఖకు ఆదేశాలు జారీ చేశారు. నిర్ణీత గడువులోగా ఈ ప్రక్రియను పూర్తి చేసి ఉద్యమకారుల త్యాగాలకు తగిన గుర్తింపు ఇవ్వాలని న్యాయమూర్తి తన తీర్పులో పేర్కొన్నారు.
హైకోర్టు ఇచ్చిన ఈ చారిత్రాత్మక తీర్పుపై తెలంగాణ ఉద్యమకారులు హర్షం వ్యక్తం చేస్తున్నారు. ఎన్నో యేళ్లుగా ప్రభుత్వ కార్యాలయాల చుట్టూ తిరుగుతున్నా పరిష్కారం కాని తమ సమస్య, న్యాయస్థానం జోక్యంతో కొలిక్కి వచ్చిందని వారు సంతోషం వ్యక్తం చేస్తున్నారు. ప్రభుత్వ స్పందన ఎలా ఉంటుందో వేచి చూడాల్సి ఉన్నప్పటికీ, 8 వారాల గడువు విధించడంతో త్వరలోనే తమకు ఇళ్ల స్థలాలు మరియు ఆర్థిక భరోసా లభిస్తాయని వారు ధీమాతో ఉన్నారు.
