నిఖత్ జరీన్ కు కంగ్రాట్స్ చెప్పిన కేటీఆర్
వరంగల్ టైమ్స్, హైదరాబాద్ : తెలంగాణ యువ బాక్సర్ నిఖత్ జరీన్ స్ట్రాంజా స్మారక బాక్సింగ్ టోర్నీలో స్వర్ణ పతకంతో మెరిసింది. ఈ సందర్భంగా రాష్ట్ర ఐటీ, పురపాలక శాఖ మంత్రి కేటీఆర్ జరీన్ కు ట్విట్టర్ వేదికగా శుభాకాంక్షలు తెలుపుతూ ట్వీట్ చేశారు. 2019 స్ట్రాంజా స్మారక టోర్నీలో స్వర్ణం చేజిక్కించుకున్న ఈ ఇందూరు చిచ్చర పిడుగు, తన పిడిగుద్దులతో మరోసారి బంగారు పతకం తన ఖాతాలో వేసుకుంది. కరోనా కష్టకాలంలో పడిన శ్రమకు తగ్గ ఫలితం దక్కించుకుంది. 
బల్గేరియా వేదికగా ఆదివారం జరిగిన మహిళల 52 కేజీల ఫైనల్లో తెలంగాణ స్టార్ నిఖత్ 4-1 తేడాతో టెటియానా కోబ్ ( ఉక్రెయిన్ ) ను చిత్తు చేసింది. సెమీఫైనల్లో టోక్యో ఒలింపిక్స్ రజత పతక విజేత బూసనాజ్ పై గెలుపొందిన నిఖత్ , ఆఖరి పోరులోనూ అదేస్థాయి ప్రదర్శన కనబర్చింది. ప్రత్యర్థికి ఏమాత్రం అవకాశం ఇవ్వకుండా హుక్, జాబ్ పంచ్ లతో విరుచుకుపడింది. 48 కేజీల విభాగంలో మరో భారత బాక్సర్ నీతూ 5 -0తో ఎరికా ప్రిసియాండారో ( ఇటలీ)పై నెగ్గి పసిడి ఖాతాలో వేసుకుంది.
