హైదరాబాద్‌: గ్రేటర్‌ హైదరాబాద్‌ మున్సిపల్‌ కార్పొరేషన్‌ ఎన్నికలకు ఎలాంటి అవాంఛనీయ సంఘటనలు జరగకుండా పకడ్బందీ ఏర్పాట్లు చేసినట్లు సైబరాబాద్ సీపీ సజ్జనార్ తెలిపారు. తప్పడు ప్రచారాలు, సోషల్ మీడియాలో పోస్టులపై నిఘా పెట్టినట్లు వివరించారు. రెచ్చగొట్టే వ్యాఖ్యలు చేస్తే కఠిన చర్యలు తప్పవన్నారు. మంగళవారం జరిగే బల్దియా పోలింగ్‌కు 13,500 మంది సిబ్బందితో బందోబస్తు కల్పిస్తున్నట్లు చెప్పారు. వీరిలో 10,500 సివిల్, 3000 మంది ఏఆర్ సిబ్బంది ఉంటారన్నారు. పోలీస్ సిబ్బందికి మూడు సార్లు తర్ఫీదు ఇచ్చినట్లు వివరించారు. స్టేట్ ఎలక్షన్ కమిషన్ గైడ్ లైన్స్ ప్రకారం అన్ని ప్రాంతాల్లో గట్టి పోలీసు బందోబస్తు ఏర్పాటు చేసినట్లు సీపీ స్పష్టం చేశారు. రేపు ఉదయం 7 నుంచి సాయంత్రం 6 గంటల వరకు పోలింగ్ ఉంటుందని ఓటర్లు నిర్భయంగా తమ ఓటు హక్కు వినియోగించుకోవాలని కోరారు. కోవిడ్ నియమ నిబంధనలు పాటించి ఓటింగ్ లో పాల్గొనాలని సైబరాబాద్ సీపీ సజ్జనార్ సూచించారు.
బందోబస్తులో ఉన్న పోలీస్ సిబ్బంది వివరాలు..
– నార్మల్, సెన్సిటివ్, హైపర్ సెన్సిటివ్, క్రిటికల్ పోలింగ్ కేంద్రాల వద్ద ఎస్సై , సీఐ స్థాయి అధికారి, ఏసీపీ, ఏడీసీపీ, డీసీపీల నేతృత్వంలో భద్రత ఏర్పాటు.
– 38 స్ట్రైకింగ్ ఫోర్స్, 11 స్పెషల్ స్ట్రైకింగ్ ఫోర్స్, 9 సీపీ రిజర్వ్ టీమ్స్, 11 ఫ్లయింగ్ స్క్వాడ్స్, 11 స్టాటిక్ సర్వైలెన్స్ టీమ్ లు అందుబాటులో ఉంటారు.
– 73 హైపర్ సెన్సిటివ్ పికెట్ లు నియమించి కట్టుదిట్టమైన భద్రత.
– హైపర్ సెన్సిటివ్ పోలింగ్ కేంద్రాల వద్ద 1 ఎస్సై, 4 గురు ఏఆర్ సిబ్బంది నియమించాము.
– సైబరాబాద్ కమిషనరేట్ లో 38 వార్డులు ఉన్నాయి
– 2437 పోలింగ్ స్టేషన్లు ఉన్నాయి.
– 1421 నార్మల్ పోలింగ్ స్టేషన్ లు ఉన్నాయి.
– 766 సమస్యాత్మక పోలింగ్ స్టేషన్ లు ఉన్నాయి.
– 250 అత్యంత సమస్యాత్మక పోలింగ్ స్టేషన్ లు ఉన్నాయి.
– 177 మొబైల్ పార్టీలతో నిరంతరం మానిటరింగ్ చేస్తున్నాము.
– సైబరాబాద్ లో 15 బార్డర్ చెక్ పోస్ట్ లు ఏర్పాటు చేశాం.
– హైపర్ సెన్సిటివ్ ఏరియా ల్లో 73 పికెట్ లు ఏర్పాటు చేశాం.
– 587 లైసెన్సేడ్ గన్స్ డిపాజిట్ చేశాం
– 369 మంది రౌడీ షీటర్ లను బైండోవర్ చేశాం.
– రూ. 15 లక్షలు విలువ చేసే 396 లీటర్ల మద్యాన్ని స్వాధీనం చేసుకున్నాం
– ప్రతి పోలింగ్ స్టేషన్ కు జియో ట్యాగింగ్ ఏర్పాటు
– పెండింగ్ లో ఉన్న 24 మంది పై నాన్ బెయిబుల్ వారెంటిలు ఎక్జి క్యూట్ చేశాం.
– సమస్యాత్మక పోలింగ్ కేంద్రాల వద్ద సీసీటీవీ లు ఏర్పాటు చేసి వాటిని ఎలక్ట్రానిక్ ప్లాట్ ఫామ్ ద్వారా అనుసంధానం చేశాం.
– జియో ట్యాగింగ్ ద్వారా పోలింగ్ కేంద్రాన్ని అనుసంధానం చేసాము.
– 1 లక్ష సీసీ కెమెరాలు ద్వారా సమస్యాత్మక ప్రాంతాలను మానిటరింగ్ చేస్తున్నాము.
– డీసీపీ, ఏసీపీ ఆఫీస్ లో రౌండ్ ది క్లాక్ నిరంతర పర్యవేక్షణ ఉంచాము.
– ఎన్నికల అనంతరం లైవ్ స్ట్రీమింగ్ ద్వారా స్ట్రాంగ్ రూమ్ వద్ద నిఘా ఉంచాము.
– ఎలక్షన్ ఏజెంట్ కి ప్రత్యేక వాహనం అనుమతి ఉండదు.
– పోలింగ్ కేంద్రాల నుంచి 200 మీటర్ ల వద్ద ఓటర్ లు తమ వాహనాలు పార్క్ చేసుకోవాలి.
– ఓటర్లను తరలించడం చట్ట విరుద్ధం అలా చేస్తే వాహనాలు సీజ్ చేస్తామని సైబరాబాద్ సీపీ సజ్జనార్ హెచ్చరించారు.
