ముంబై: కాంగ్రెస్ మాజీ నాయకురాలు , ప్రముఖ బాలీవుడ్ నటి ఊర్మిళా మంటోడ్కర్ పార్టీ మారనున్నారు. సోమవారం శివసేస పార్టీలోకి చేరనున్నట్లు సమాచారం. 2019 ఎంపీ ఎన్నికల్లో కాంగ్రెస్ తరపున నార్త్ ముంబై నుంచి పోటీ చేసిన ఆమె బీజేపీ సీనియర్ నేత గోపాల్ చినయ్య చేతిలో ఓటమి చవిచూశారు. 2019 మార్చిలో కాంగ్రెస్ సభ్యత్వం తీసుకున్న ఆమె అదే సంవత్సరం సెప్టెంబర్లో పార్టీ ప్రాథమిక సభ్యత్వానికి రాజీనామా చేసిన విషయం తెలిసిందే. ఆ సమయంలో కాంగ్రెస్లోని రాజకీయాల కారణంగానే పార్టీకి దూరం అవుతున్నట్లు ఆమె వివరించారు. పార్టీలో పెద్ద లక్ష్యంతో పనిచేయడానికి బదులు అంతర్గత రాజకీయాలు , పార్టీలోని స్వార్థ ప్రయోజనాలతో పోరాటం చేయడం కష్టంగా ఉందని ఆగ్రహం వ్యక్తం చేశారు. ముంబై కాంగ్రెస్ చీఫ్ మిలింద్ దేవరాతో తాను పంచుకున్న విశ్వసనీయ సమాచారం కూడా బహిర్గతం కావడంపై ఆమె తీవ్ర అసంతృప్తి వ్యక్తం చేశారు. ముంబైలో తన ఓటమికి పార్టీలోని కొన్ని శక్తులు పనిచేశాయని విమర్శించారు. అయితే నాటి నుంచి రాజకీయాలకు దూరంగా ఉంటున్న ఈ బాలీవుడ్ ముద్దుగుమ్మ సోమవారం నుంచి కొత్త రాజకీయాల్లోకి అడుగుపెడుతున్నారు. శాసన మండలికి ఊర్మిళ నామినేట్..చాలాకాలం నుంచి ఊర్మిళా శివసేనలో చేరుతారనే చర్చ మహారాష్ట్రలో జోరుగా చర్చ జరుగుతోంది. ప్రస్తుతం రాష్ట్రంలో శివసేన నేతృత్వంలోని సంకీర్ణ ప్రభుత్వం ఆమెను మండలికి నామినేట్ చేయనున్నట్లు సమాచారం. ఇటీవల ప్రభుత్వం ఆమె పేరును గవర్నర్ భగత్సింగ్ కొష్యారికి పంపింది. ఈక్రమంలోనే ఆమె శివసేనలోకి చేరుతున్నట్లు విశ్వసనీయ సమాచారం.
