హైదరాబాద్ : ప్రస్తుత పరిస్థితులు ముస్లిం ఆర్థిక వ్యవస్థపై గణనీయమైన ప్రభావాన్ని చూపుతున్నందున ముస్లిం బాలికలు స్వయం సమృద్ధిగా మరియు వారి కుటుంబాలకు మద్దతుగా ఉండటానికి కృషి చేయాలని హోం మంత్రి అన్నారు. తన అధికారిక నివాసంలో సోమవారం నాడు ఖాన్ లతీఫ్ ఖాన్ ఫౌండేషన్ ఆధ్వర్యంలో విద్యార్థినులకు టైలారింగ్, హెన్నా డిజైనింగ్ లలో శిక్షణ పొందిన వారికి సర్టిఫికెట్లను మంత్రి పంపిణీ చేశారు.
కరోనా మహమ్మారి ప్రపంచవ్యాప్తంగా ఆర్థిక వ్యవస్థపై విధ్వంసక ప్రభావం చూపిందని, దీని వల్ల ప్రజలు ఇబ్బంది పడుతున్నారని తెలిపారు. ముఖ్యంగా ముస్లింల ఆర్థిక పరిస్థితి గణనీయంగా దిగజారిందని ఆయన అన్నారు. తెలంగాణ ప్రభుత్వం ఏడేళ్ల పాలనలో రాష్ట్రాన్ని ప్రగతిపథంలోకి తీసుకెళ్లిందనీ, ఈ ఏడేళ్లలో ముస్లింలకు ఎన్నో విశిష్ట పథకాలు అందాయని వివరించారు.
మహిళలు సులువుగా స్వయం సమృద్ధి సాధించేందుకు వీలుగా తెలంగాణ ప్రభుత్వం తరపున వేల సంఖ్యలో కుట్టు మిషన్లు ఏర్పాటు చేయనున్నామని తెలియజేశారు. విద్యార్థినుల జీవితాలు సుభిక్షంగా ఉండాలంటే నైతికత పెంపొందించుకోవాలని సూచించారు.
స్మార్ట్‌ఫోన్ నుండి మంచి విషయాలు నేర్చుకుని, వాటిని వినియోగించుకోవాలని, అన్ని రకాల చెడుల నుండి తమను తాము రక్షించుకోవాలని ఆయన కోరారు.వస్త్ర నమూనాల ప్రదర్శన మరియు బాలికలు తయారు చేసిన హెన్నా డిజైన్లను సమావేశంలో ప్రదర్శించారు. ఫౌండేషన్ ప్రతినిధి నుజ్రత్ బేగ్ , నాంపల్లి ఇంఛార్జి ఆనంద్ కుమార్, జకి తదితరులు కార్యక్రమంలో పాల్గొన్నారు.
