హైదరాబాద్: టీఆర్ఎస్ను గ్రేటర్ ప్రజలు అతిపెద్ద పార్టీగా ఆశీర్వదించారని మంత్రి వేముల ప్రశాంత్ రెడ్డి అన్నారు. జీహెచ్ఎంసీ ఎన్నికల ఫలితాల్లో కుత్బుల్లాపూర్ నియోజకవర్గంలో విజయం సాధించిన టీఆర్ఎస్ అభ్యర్థులు శనివారం ఎమ్మెల్సీ శంభీపూర్ రాజు ,ఎమ్మెల్యే కేపీ వివేకానంద్ గౌడ్ తో కలిసి మంత్రి వేముల ప్రశాంత్ రెడ్డి ని హైదరాబాద్ లోని ఆయన నివాసం లో మర్యాదపూర్వకంగా కలిశారు. ఈ మేరకు గెలిచిన అభ్యర్థులకు మంత్రి శుభాకాంక్షలు తెలిపారు. సీఎం కేసీఆర్ మంత్రి కేటీఆర్ ఆదేశాల మేరకు కుత్బుల్లాపూర్ నియోజకవర్గంలో గ్రేటర్ ఎన్నికల ప్రచారం నిర్వహించినట్లు తెలిపారు.. అలాగే మంత్రి మల్లారెడ్డి , ప్రభుత్వ విప్ గంపగోవర్ధన్, ఎమ్మెల్సీ శంభీపూర్ రాజు ఎమ్మెల్యేలు బాజి రెడ్డి గోవర్ధన్, పెద్ది సుదర్శన్ రెడ్డి, జీవన్ రెడ్డి , హనుమంత్ షిండే కేపీ వివేకానంద్ , డీసీసీబీ చైర్మన్ భాస్కర్ రెడ్డి నాయకులు పోచారం సురేందర్ రెడ్డి సమష్టి కృషితో కుత్బుల్లాపూర్ నియోజకవర్గంలో టీఆర్ఎస్ అఖండ విజయం సాధించిందని తెలిపారు. టీఆర్ఎస్కు ఓటు వేసి ప్రజలకు మంత్రి ప్రత్యేక ధన్యవాదాలు తెలిపారు. ప్రచార సమయాల్లో ప్రజలు వివిధ సమస్యలను తమ దృష్టికి తెచ్చారని ఈ సమస్యలను సీఎం కేసీఆర్ దృష్టికి తీసుకెళ్ళి పరిష్కారం చూపుతామని అన్నారు. గత ఆరేండ్లలో ప్రభుత్వం ఎలాంటి అభివృద్ధి చేసిందో అదే తరహాలో రాబోయే రోజుల్లో నగర అభివృద్ధికి తోడ్పాటునందిస్తామని అన్నారు.
