హైదరాబాద్ లో ప్రారంభమైన శోభాయాత్ర
వరంగల్ టైమ్స్, హైదరాబాద్ : హైదరాబాద్ నగరంలో హనుమాన్ శోభాయాత్ర ప్రారంభమైంది. గౌలిగూడలోని రామ్ మందిర్ నుంచి సికింద్రాబాద్ లోని తాడ్ బండ్ వరకు 12 కిలోమీటర్ల మేర ఈ శోభాయాత్ర కొనసాగనుంది. ఈ శోభాయాత్రలో వేలాది మంది భక్తులు పాల్గొంటున్నారు. శోభాయాత్ర ప్రారంభం కంటే ముందు హిమాచల్ ప్రదేశ్ గవర్నర్ బండారు దత్తాత్రేయ గౌలిగూడ రామ్ మందిర్ వద్ద ప్రత్యేక పూజలు చేశారు. ఇక కర్మన్ ఘాట్ హనుమాన్ టెంపుల్ నుంచి కూడా శోభాయాత్ర ప్రారంభమైంది.
ఈ రెండు శోభాయాత్రలు కోఠిలో కలుసుకోనున్నాయి. గౌలిగూడ, కోఠి, సుల్తాన్ బజార్, చిక్కడపల్లి, ఆర్టీసీ క్రాస్ రోడ్స్ , అశోక్ నగర్ ఎక్స్ రోడ్, గాంధీ నగర్, కవాడిగూడ, ఆర్పీ రోడ్ , ప్యారడైజ్ మీదుగా శోభాయాత్ర కొనసాగనుంది. హనుమాన్ శోభాయాత్ర నేపథ్యంలో పోలీసులు పటిష్ట బందోబస్తు ఏర్పాటు చేశారు. హైదరాబాద్ పోలీస్ కమిషనర్ సీవీ ఆనంద్ శోభాయాత్రకు సంబంధించిన భద్రతను ఎప్పటికప్పుడు పర్యవేక్షిస్తున్నారు. సీసీ కెమెరాలు, డ్రోన్ కెమెరాలతో నిఘా ఉంచారు. మొత్తం 8 వేల మంది పోలీసులు బందోబస్తులో పాల్గొన్నారు. ఎలాంటి అవాంఛనీయ ఘటనలు జరుగకుండా పోలీసులు తగు జాగ్రత్తలు తీసుకుంటున్నారు.
